Ирандағы соғыс Қазақстанның астық экспортына қалай әсер етіп жатыр
АСТАНА. KAZINFORM – Ирандағы геосаяси жағдай Қазақстанның сыртқы саудасына айтарлықтай әсер етпейді. Ұлттық экономика министрлігіндегілер Kazinform сауалына берген жауапта осындай ұстаным білдірген.
Ведомствоның мәліметінше, 2025 жылы екі ел арасындағы тауар айналымы 430,2 млн доллар болған. Ал бұл Қазақстанның жалпы саудасының 0,3%-ы ғана.
- Экспорт – $239,3 млн, импорт – $191 млн. Қазақстанның Иранға экспорттайтын негізгі тауары – арпа мен бидай (90%-дан астам). Бұл көлемдер басқа нарықтарға бағытталуы мүмкін. Қазақстан Ираннан полимерлі өнімдер, кептірілген жеміс, ірімшік, сүзбе, май сияқты азық-түлік өнімдерін импорттайды. Бұл Иран бағыты логистикалық маршруттар мен жүктерді жеткізу бөлігінде қазақстандық тауарларды жеткізудің негізгі арнасы болып отырған жоқ, - деп жазылған министрлік мәліметінде.
Жауаптан Ирандағы жағдай ушыға берсе, Қазақстан астық экспортының балама бағыттарын іздеуге мәжбүр болатынын аңғаруға болады. Бұл – экспорт мүмкіндіктерінің шектелуінен белгі беретін жайт.
Айта кетейік, бұған дейін еліміз биыл 76 млн тонна мұнай экспорттауды жоспарлап отырғаны хабарланды.
Ал астық пен ұн экспорты 9,9 млн тоннаға жетті.
