Ішімдікке тойған прапорщик 24 солдатты соққыға жықты
БІШКЕК. ҚазАқпарат - Қырғызстанның Жалал-Абад облысы Таш-Құмыр қаласында ішімдікке сылқия тойып алған прапорщик 24 солдатты соққыға жықты. Бұл туралы «Кабар» агенттігі Азаптаулардың алдын алу жөніндегі ұлттық орталыққа (ААҰО) сілтеме жасап хабарлады.
Мәлім етілгендей, ААҰО-ға Төтенше жағдайлар министрлігінің әскери бөлімінде 24 сарбаз соққыға жығылғаны туралы ақпарат түскен.
«Бізге ақпарат түскеннен кейін, мән-жайды анықтау үшін өкілімізді жібердік. Солдаттардың сөзінен белгілі болғандай, 10 маусым күні таңғы сағат 5-те ішімдікке тойып алған прапорщик кіріп келіп, сарбаздарға әлімжеттік көрсете бастаған - денелерін жерге тигізіп, көтерткен, жатқызып қойып ұрған, соққылар жасаған», - деді орталық директоры Нурдин Сулайманов.
9 әскери қызметшінің иегінің асты жыртылған. Олардың кейбіріне тігістер салу қажет болған.
Прапорщик 48 сағатқа қамауға алынып, қылмыстық іс қозғалды.
Оқиғаның тергеп-тексерілуін Қырғызстанның Төтенше жағдайлар министрі өз бақылауына алды.
