Ісік ауруларына күдік болғанда емдеуді жеделдету үшін «Жасыл жол» ережесі енгізілді
НҰР-СҰЛТАН. ҚазАқпарат – Амбулаториялық жағдайда көмек көрсетудің жаңа қағидалары бекітілді. Бұл туралы ҚР Денсаулық сақтау министрі Ажар Ғиният айтты, деп хабарлайды ҚазАқпарат тілшісі.
«Сондай-ақ, азаматтардың көптеген өтініштерін ескере отырып, амбулаториялық жағдайда көмек көрсетудің жаңа қағидалары бекітілді. Онда жалпы практика дәрігерінің жолдамасынсыз консультациялық-диагностикалық қызметтерді тікелей алу көзделген», - деді ол Орталық коммуникациялар қызметінде өтіп жатқан баспасөз мәслихатында.
Министрдің атап өтуінше, онкологиялық және гематологиялық ауруларға күдік болған кезде зерттеп-қарау мен емдеуді жеделдету үшін «Жасыл жол» ережесі енгізілді. Яғни қандай да бір ісік ауруларына күдік болса, барлық зерттеулерді 18 күнің ішінде емханалардан өтіп болуы керек. Олар: зертханалық зерттеулер, ЭКГ, рентген, КТ, МРТ, ультрадыбыстық және эндоскопиялық зерттеулер.
«2025 жылға қарай 500 медициналық-санитариялық алғашқы көмек нысанын салу, ауыл тұрғындары мен балаларға арналған профилактиканың жаңа тәсілдерін енгізу, яғни Check-Up өткізу, пациентке бағдарланған мобилдік бригадалар, үздік практика орталықтары, ауруларды басқару бағдарламасы жетілдірілетін болады. Консультациялық-диагностикалық қызметтерді кеңейтілуде», - деді Ажар Ғиният.
