Испания мигранттардың жаңа жаппай ағымынан қауіптеніп, Сеутаға әскери кемелер жіберді
АСТАНА. KAZINFORM — Испания жаппай заңсыз мигранттар легі тағы болуы мүмкін деген қауіпке байланысты Африканың солтүстігіндегі Сеута автономды қаласында қауіпсіздік шараларын күшейтіп жатыр, деп хабарлайды Kazinform Euronews-ке сілтеме жасап.
Испаниялық БАҚ-тың хабарлауынша, бұған әлеуметтік желілерде 15 тамызда Марокко мен Испанияға қарайтын Сеута арасындағы шекараны жаппай бұзып өтуге шақырған үндеулердің таралуы себеп болған.
Теңіз арқылы заңсыз өтуге жол бермеу үшін Тарахаль шекаралық толқын тосқауылы маңына арнайы қалқымалы үрлемелі бөгет орнатылды. Ол мигранттардың теңіз арқылы шекараны кесіп өтуін қиындатуға тиіс.
Бұдан бөлек, Испания Әскери-теңіз күштерінің екі фрегаты Сеута жағалауына жіберілді. Билік Азаматтық гвардия мен Ұлттық полицияның күшін де арттырды. Құқық қорғау органдары шекараны патрульдеу, мигранттарды анықтау және жақында болған көші-қон дағдарысының мән-жайын тергеу жұмыстарын жалғастырып жатыр.
Сот жүйесінде де қосымша шаралар қабылданды. Сот медицинасы және криминалистика институты қаза тапқандар мен хабар-ошарсыз кеткендердің көп болуына байланысты мамандар санын жетіден 19 адамға дейін көбейтті. Прокуратура төтенше жағдайға байланысты қылмыстық істерді тергеуге қосымша қызметкерлер жіберді.
Еске салайық, 30 шілдеде мыңдаған заңсыз мигрант Африканың солтүстігінде, Мароккомен шекаралас орналасқан Испанияның Сеута қаласына жеткен болатын. Испания Ішкі істер министрлігінің мәліметінше, елге шамамен 72 мың мигрант кірген. Олардың жартысынан астамы корольдік аумағынан шығып кеткен. Мароккодан Испанияның Сеута анклавына заңсыз өтуге әрекет жасау кезінде қаза тапқандар саны 72 адамға дейін жеткен.
Испанияның Сеута анклавына заңсыз өткен шамамен 50 мың мигранттың жартысынан көбі Мароккоға қайтарылды.
Соған қарамастан, заңсыз мигранттардың шағын топтары Фнидек жағалауындағы толқын бөгетін айналып өту немесе теңіз арқылы жүзіп өту арқылы Сеутаға жетуді жалғастырып жатыр. Ақпаратқа сәйкес, олар Марокконың қауіпсіздік күштері тарапынан айтарлықтай қарсылыққа тап болмай отыр.
Осыдан кейін Италия Испаниямен арадағы Шенген келісімінің қолданылуын уақытша тоқтатып, теңіз және әуе шекараларын жапты.
Сондай-ақ Испания мигранттар легіне байланысты Сеутаға әскер жібергенін де жазғанбыз.
Мароккода мигранттардың Сеутаға заңсыз кіру ісіне қатысты 25 адам сотқа тартылды.
