Италияда қатты құрғақшылыққа байланысты төтенше жағдай жарияланды
Бұл – Италияда соңғы 70 жылдағы ең ауыр қуаңшылық. Жауын-шашын мөлшері соңғы үш онжылдықтағы орташа көрсеткішпен салыстырғанда екі есе азайды. Елдің орталық және оңтүстік өңірлерінде су тапшылығы жиі байқалады.
«Ломбардия тарихында мұндай дағдарыс ешқашан болған емес», - деді губернатор А.Фонтана жұма күні Ломбардияның құрғақшылыққа байланысты төтенше жағдай жариялағаннан кейін.
Ломбардия - Италияның солтүстігіндегі ең ірі провинциялардың бірі. Жергілікті билік енгізген қаулы барлық азаматтарды «суды өте үнемді, тұрақты және тиімді пайдалануға, оның тұтынуын қажетті минимумға дейін шектеуге» үндеп отыр.
Осыған байланысты Милан билігі демалыс күндері субұрқақтарын өшіріп жатқанын мәлімдеді. Азаматтық қорғаныс департаментінің басшысы Фабрицио Курчио Италиядағы ең ұзын өзен По өзеніндегі судың көлемі әдеттегіден 80 пайызға азайғанын айтты. Ол мұны соңғы уақытта жауын-шашын деңгейі соңғы жылдардағы орташа деңгейден 40-50 пайызға, ал қыста жауатын қардың 70 пайызға азайғанымен түсіндірді.