Израиль соңғы оқиғаларға қарамастан, палестиналықтармен келіссөзді жалғастыруға үмітті

АСТАНА. Маусымның 4-і. ҚазАқпарат - Израиль соңғы оқиғаларға қарамастан, палестиналықтармен арадағы келіссөз үдерісінің жалғасатынына үмітті. Бұл туралы бейсенбі күні Израильдің қорғаныс министрі Эхуд Барак АҚШ Президентінің Таяу Шығыс бойынша арнайы өкілі Джордж Митчеллмен болған кездесуде мәлім етті, деп хабарлайды ИТАР-ТАСС агенттігі.

«Барлық қиыншылықтарды жеңеміз және соңғы оқиғаларға қарамастан, палетиналықтармен арадағы тікелей емес келіссөздерді жалғастырамыз деп үміттенеміз», - деді министр Эхуд Барак өз сөзінде. Ол сондай-ақ, «бұл келіссөздердің, бейбіт процесте ілгерілеушілікке қол жеткізетін тікелей диалогқа әкелетініне» үміт білдірді.

АҚШ-тың арағайындығымен тікелей емес палестина-израиль келіссөздерінің басталғаны туралы мамырдың 9-ында жария етілген болатын, содан бері Митчелл Израиль премьері Биньянмин Нетаньяхумен және Палестина ұлттық әкімшілігінің басшысы Махмұд Аббаспен жеке бірнеше кездесулер өткізді. Бірақ, Израиль әскери-теңіз күштерінің Газа секторына гуманитарлық көмек жеткізбек болған «Азаттық флотилиясына» жасаған шабуылынан кейін, Махмұд Аббас Израильдің атына үзілді-кесілді мәлімдемелер жасады, бірақ келіссөз үдерісінен шығатыны туралы әзірге тікелей жария еткен жоқ.