Израиль Трамп мақұлдаған америкалық ауыр бомбалар партиясын алды
АСТАНА. KAZINFORM – Израиль АҚШ президенті Дональд Трамп МК-84 бомбаларын экспорттауға салынған тыйымды алып тастағаннан кейін аталған оқ-дәріге қол жеткізді. Бұл бомбаны экспорттауға АҚШ-тың бұған дейінгі президенті Джо Байден әкімшілігі тыйым салған болатын, деп хабарлайды Kazinform агенттігі Америка дауысына сілтеме жасап.
Жексенбі күні журналистер алдында сөз сөйлеген Трамп соғысты тоқтату туралы келісімге қол жеткізілгеніне қарамастан Байден енгізген бомбаны жеткізуге тыйымды жойғанын мәлімдеді. Өйткені «күштің көмегімен бейбітшілік» қағидаты ұстанылады.
- Олар бұл оқ-дәріге Байден әкімшілігі кезінде тапсырыс берген еді. Бірақ, Байден бұл қаруды жеткізген жоқ. Мен бұған басқаша қараймын. Мен «күштік көмегімен бейбітшілік» деп айтамын, - деп мәлімдеді Трамп.
МК-84 – бұл салмағы 907 келі болатын басқарылмайтын ұшақтан тасталатын бомба. Ол қалың бетон мен темір қабатын тесіп өтіп, ауқымды аумақты талқандауға қауқарлы.
Байден әкімшілігі Израильге бұл оқ-дәріні экспорттаудан бас тартқан еді. Оған Газа секторының халқы қалың аудандарында аталған бомбаны қолдану қаупі себеп болған-ды.
- Трамп әкімшілігі тыйымды алып тастағаннан кейін бүгін кешке Израильге жеткізілген оқ-дәрі Израиль әскери-әуе күштері мен армиясы үшін маңызды стратегиялық ресурс саналады. сонымен қатар Израиль мен АҚШ арасындағы мызғымас одақтастықты дәлелдейді, - деп мәлімдеді Израиль қорғаныс министрі Исраэль Кац сенбі күні.
Бұған дейін Израиль премьер-министрі Биньямин Нетаньяху АҚШ президенті Дональд Трамптың Таяу Шығыс жөніндегі арнайы өкілі Стивен Уиткоффқа 17 ақпанда Израильдің әскери-саяси кабинетін шақырып, тұтқындарды босату және Газа секторында атысты тоқтату жөніндегі келісімнің екінші кезеңін талқылайтынын мәлімдегенін жазған едік.
