«Израильдің улы «парацетамолы» қазақстандық нарыққа түсті» – фейк
WhatsApp-та Израильде шығарылған қауіпті «парацетамол» препараты туралы ақпараттар топтамасы тарап жатыр. Онда аталған дәрі палестиналықтарға арналып өндірілгені, оны қабылдаған адам көз жұматыны және таблеткалар әлдебір жолдармен Ресей мен Қазақстан нарығына түскені айтылады. Stopfake.kz мәліметтің анық-қанығын анықтап көрді, деп хабарлайды Kazinform.
Анықталғандай, ақпаратқа қоса берілген фотодағы препарат Израильде емес, Үндістанда шығарылған. Оны дәрі-дәрмектің қаптамасында жазылған өндіруші компанияның Apex деген атауынан түсінуге болады.
«Қазнетте «қауіпті» парацетамол туралы хабарламалар бұған дейін де тараған еді. Ол кезде пайдаланушылар таблеткаларда өлімге әкелетін «Мачупо» вирусы бар деп айтқан. ҚР Фармация комитеті бұл ақпаратты жоққа шығарып, елімізде ақпаратта сипатталған таблеткалар жоқ екендігін мәлімдеді.
Олай болса, қазақстандық дәріханаларға түскен қызуды түсіретін аса қауіпті дәрмек туралы хабарлама – ескі фейк», - деп қорытындылайды Stopfake.kz.
