Кабо-Верде «Hondius» лайнерінен науқастарды эвакуациялауды қолға алды
АСТАНА. KAZINFORM – Кабо-Верде билігі бортында респираторлық аурудың өршуі тіркелген Нидерландының «Hondius» круиздік кемесінен науқастарды әуе арқылы эвакуациялауға дайындалып жатыр, деп хабарлайды Xinhua News Agency.
Ел астанасы Прая портында рейдте тұрған кемеге сақтық шаралары ретінде портқа кіруге рұқсат берілмеген. Бұл шешім Халықаралық медициналық-санитарлық ережелерге сәйкес және қоғамдық денсаулықты қорғау мақсатында қабылданғанын Ұлттық денсаулық сақтау директоры Анжела Гомес баспасөз конференциясында мәлімдеді.
Оның айтуынша, кемеде жолаушылар мен экипаж мүшелерін қосқанда барлығы 147 адам бар. Олардың үшеуінде жеңіл симптомдар анықталған. Науқастардың жағдайы тұрақты, олар тұрақты медициналық бақылауда және ауруханаға жатқызуды қажет етпейді.
Гомес сондай-ақ сырқаттанғандардан алынған сынамалар зерттеліп жатқанын, оның ішінде індеттің себебін анықтау үшін шетелдік зертханаларда да тексеріліп жатқанын айтты.
Эвакуация Ұлыбритания және Нидерланды елдерімен үйлестіріліп жатыр. Кабо-Верде науқастарды тасымалдауға арналған арнайы медициналық ұшақтың келуін күтіп отыр.
Ведомство өкілінің айтуынша, жағдай бақылауда және халыққа қауіп төндірмейді. Кеме эвакуация аяқталғанға дейін және жағдайдың себептері анықталғанша бақылауда болады.
Еске сала кетейік, Бангладеште қызылша эпидемиясы өршіп барады: соңғы тәулікте 17 адам көз жұмды.
