Қала ғана емес, әр ауыл мектебіне камера қойылып, дабыл батырмасы орнатылады

АСТАНА. KAZINFORM - Тамара Дүйсенова білім мекемелеріндегі бейнебақылау камералары, дабыл батырмалары мен турникеттер орнату жөніндегі жұмыстарды жеделдетуді тапсырды. 

Білім нысандарының қауіпсіздігі мәселелері ҚР Премьер-Министрінің орынбасары Тамара Дүйсенованың төрағалығымен өткен кеңесте талқыланды.

Жиынға орталық мемлекеттік органдардың өкілдері мен облыс әкімдерінің орынбасарлары қатысты.

Бүгінде білім нысандары маңындағы жол қауіпсіздігі инфрақұрылымын жақсартуға байланысты өңірлерде тиісті жол картасы бекітілген.

Оның аясында мектептер, балабақшалар, қосымша білім беру ұйымдары маңында бағдаршамдар, жол белгілерін орнату, жаяу жүргіншілер тротуарларын жасау секілді бірқатар шаралар қамтылған.

Ішкі істер министрінің орынбасары Игорь Лепеханың келтірген мәліметінше, 13 мыңнан аса жалпы білім мекемесінің (65%) маңында барлық тиісті талаптар сақталған. 

Көрсеткішті жақсарту үшін биыл және келесі жылы 28 мыңнан астам шараны қолға алу жоспарланып отыр. 

Биыл әзірге 570 нысанның айналасында тиісті жұмыстар аяқталды.

«Батыс Қазақстан, Қостанай, Шығыс Қазақстан және Абай облыстарында жол қауіпсіздігі инфрақұрылымын жақсартуға бағытталған шаралармен қамтылған нысандар саны 10-ға да жетпейді», – деді Игорь Лепеха.

Қабылданып жатқан шаралар туралы облыс әкімдерінің орынбасарлары да баяндады.

«Бекітілген жол картасында көрсетілген мерзімнің сақталуына баса мән берген жөн. Жаз мезгілі тез өте шығады. Сондықтан тиісті жұмыстарды атқаруға жайлы мерзімді барынша тиімді қолдану керек», – деп атап өтті Тамара Дүйсенова.

Кеңесте сондай-ақ білім нысандарының қауіпсіздік талаптарына сәйкестігіне қатысты да сөз қозғалды. Оқу-ағарту министрлігі биыл тиісті ережеге өзгерістер енгізген болатын. 

Оған сәйкес, контингенті 100 адамнан асатын барлық білім мекемесінде бейнебақылау камералары жедел басқару орталықтары немесе аудандық полиция бөлімдеріне қосылып, дабыл батырмалары орнатылуы керек. 

Бұған дейін талап тек қалалар мен аудан орталықтарына тиесілі болатын.

Ал 700-ден аса адам қабылдайтын мекемелерде турникеттер орнатылып, күзет қызметтерімен келісімі болуы шарт.

Осыған сәйкес, әр өңір қауіпсіздік жүйесімен қамту туралы жұмыс жоспары бекітуде. Жоспар әзірге Ақмола, Қарағанды, Қызылорда, Абай, Маңғыстау, Жамбыл, Павлодар, Шығыс Қазақстан және Солтүстік Қазақстан облыстарында ғана қабылданған.

Жиын барысында жақында Павлодар облысындағы мектепте болған жағдай да сөз болды.

Оқу-ағарту министрлігінің инфрақұрылымды дамыту департаменті директорының міндетін атқарушы Марлен Қасеновтың сөзінше, заң жүзінде білім мекемелеріне кіргізуге тыйым салынған заттардың тізімі бекітілген, өңірлер аталған тізімге сәйкес талаптардың сақталуын қамтамасыз етуі тиіс.

«Оқу-ағарту, ішкі істер министрліктері әкімдіктермен бірге бейнебақылау камераларын, дабыл батырмаларын, турникеттерді қамтамасыз ету жұмысын күшейтуі қажет. Балаларға қауіпсіз орта қалыптастыруда барлық мүмкіндікті пайдалануымыз керек», – деп атап өтті Тамара Дүйсенова.

Вице-премьер сондай-ақ, мүдделі мемлекеттік органдарға білім беру мекемелеріндегі қауіпсіздікті қамтамасыз ету үшін қосымша шаралар қабылдау жағын қарастыруды тапсырды.