Қанат Бозымбаев Маңғыстаудағы жылу мен энергияның тапшылығын түсіндірді
АСТАНА. ҚазАқпарат - «Қазатомөнеркәсіп» ұлттық компаниясы мен Маңғыстау облыстық әкімдігі «МАЭК-Қазатомөнеркәсіп» мекемесінің электр станцияларының тұрақты жұмысын қамтамасыз ету үшін тиісті шараларды қолға алуы қажет, деп xабарлайды ҚазАқпарат тілшісі.
ҚР Энергетика министрі Қанат Бозымбаевтың айтуынша, 28-30 қарашада «МАЭК-Қазатомөнеркәсіп» компаниясының 2-ші жылу орталығында автоматты реттеу жүйесінің тұрақсыз жұмысы нәтижесінде 6-шы және 9-ші турбиналарда апаттық жағдай болды. «Соның салдары Маңғыстау тұрғындарының тұтыну қабілетінің шектелуіне әкеліп соқтырды. Сонымен бірге «МАЭК-Қазатомөнеркәсіп» мекемесінің 1-ші жылу электр станциясында бірінші энергия блогында роторды ауыстыру шаралары әлі аяқталған жоқ. «Қазатомөнеркәсіп» ұлттық компаниясы Маңғыстау облыстық әкімдігімен бірлесіп, осы «МАЭК-Қазатомөнеркәсіп» мекемесінің электр станцияларының тұрақты жұмысын қамтамасыз ету үшін тиісті шараларды қолға алу қажеттігіне назар аударғым келеді», - деді Қ.Бозымбаев Үкіметтің бүгінгі отырысында.
Айта кетейік, бүгінде монополистердің қарызы 6 млрд теңгеден асты. Қарыздың басым бөлігі - 3,8 млрд теңге «МАЭК-Қазатомөнеркәсіп» ЖШС-на тиесілі. Аталған кәсіпорын газдың ақшасын төлемей отыр.
