Қанат Ислам IBO рейтингінде төмен сырғыды
АСТАНА. ҚазАқпарат - Халықаралық бокс ұйымы (IBO) барлық салмақ санаты бойынша өзекті рейтингтерді жариялады, деп хабарлайды Sports.kz.
Тізімдегі өзгерістерден қазақстандық кейбір спортшылар да шет қалмады. Иса Акбербаев ауыр салмақтың үздік жүздігіндегі 33-орнын сақтап қалса, жартылай ауыр салмақ өкілі Әли Ахмедов екі сатыға көтеріліп, 37-орынға шықты.
Бірінші орта салмақ санатындағы боксшы Қанат Ислам алтыншы орыннан сегізінші орынға түсті.
Жанқош Тұраров жартылай орта салмақ рейтингінде 56-орыннан 52-орынға көтерілді.
Бірінші жартылай орта салмақ санатында жұдырық түйістіріп жүрген Батыр Жүкембаев бұл жолы төрт орынға төмен сырғыды. Енді ол 51-орында тұр.
Жеңіл салмақ өкілі Айдар Шәрібаев бұрынғы 95-орнынан 89-орынға шықты.
Бекман Сойлыбаевтың да жағдайы шамалы жақсарды, екінші жартылай орта салмақтағы боксшымыз енді өз дивизионында 47-ші болып тұр.
Ал жеңіл (53,525 кг) салмақ дәрежесіндегі Жанат Жақиянов кәсіпқой рингтегі карьерасын аяқтағандықтан, рейтингтен шығарылды.
Фото: prosports.kz
