Қанат Исламның жаңа менеджері чемпиондық жекпе-жектерге шығуды көздейді
«Қанат Ислам корпустан қатты ұрады. Бұл - ескі қазақ боксының ұтымды бір тұсы. Ол - мықты боксшы. Оның дайындығы жоғары. Бәлкім, бұған дейін оған лайықты қарсылас болмады. Сол себепті АҚШ-тың бокс жанкүйерлері және басқа адамдар оны байқамады. Қанат та өзін жан-жақты көрсете алмады. Біз басқа жолмен жүреміз, бірден чемпиондық жекпе-жектерге шығуға тырысамыз. Алғашқы жекпе-жек сондай болады деп айта алмаймын. Дегенмен, бір-екі айқастан кейін тек чемпиондық титуталдар үшін ғана таласатын боламыз», - дейді Э.Климас.
Оның ойынша, Қанат Ислам - әлемдік деңгейдегі спортшы. Сол себепті оның қатысуымен үлкен бокс кештерін ұйымдастыруға әбден болады. Оны Қазақстанның жанкүйерлері ғана емес, әлемнің бокс фанаттары да үлкен қызығушылықпен көреді.
Айта кетейік, бүгін Қанат Ислам өзінің Инстаграм желісіндегі парақшасы арқылы АҚШ-тың танымал менеджерімен келісімшартқа отырғанын ресми түрде жариялады. Бүгінде Эгис Климаспен төрт қазақстандық боксшы - Мадияр Әшкеев (8-0, 4 КО), Сағадат Рахманқұлов (1-0, 1 КО), Мейірім Нұрсұлтанов (5-0, 4 КО) пен Асхат Уәлиханов (2-1, 2 КО) жұмыс істейді. Қанат Ислам жаңа менеджермен бірге чемпиондық жекпе-жектерге жететініне сенімді.