Қаныш Сәтбаев каналынан Шідерті алқабына су босатыла бастады
ПАВЛОДАР. KAZINFORM — Мамандар Екібастұздың ауылдық аймағы мен Ақтоғай ауданы бойынша 21 мың гектардан астам шабындықты су басады деген үмітте.
Павлодар облысында Шідерті өзеніне су жіберіле бастады. Жыл сайынғы дәстүрлі шара аясында Ертіс өзеніне жалғанған Қаныш Сәтбаев атындағы каналдан үлкен көлемде су босатылады. Бұл Ақкөл-Жайылма алқабындағы экожүйені қалпында сақтап, ауыл шаруашылығы саласын қажетті мөлшерде жем-шөппен қамтамасыз етеді.
— Бүгін, 4 сәуірде оңтайлы ауа райы жағдайлары мен топырақ ылғалдылығының жай-күйін ескере отырып, Қаныш Сәтбаев атындағы каналдан Шідерті өзеніне табиғатты қорғау және санитарлық-эпидемиологиялық су жіберулер басталды. Бекітілген көлем 120 млн текше метрді құрайды. Жалпы, су жіберу есебінен Екібастұз қаласының ауылдық аймағы мен Ақтоғай ауданында орналасқан 21 мың гектардан астам шабындық алқаптарын су басады деп болжанып отыр. Су жіберулердің барлық кезеңін мердігер ұйым және облыс әкімдігі бақылайтын болады, — деп хабарлады облыс әкімінің орынбасары Әйгерім Қабылтаева.
Бұған дейін Сәтбаев каналынан Шідерті өзені жайылмасына рекордық көлемде су жіберілетіні туралы жазғанбыз. Биылғы судың көлемі өткен жылмен салыстырғанда 33,3 млн текше метрге көп.
Ал Шығыс Қазақстандағы су қоймаларынан Ертіс өзеніне су босату 8 сәуірде басталады. Биыл оның көлемі де ұлғайып, 7 млрд текше метрден кем болмайды деп күтіліп отыр.
