Қаңтар-ақпанда қысқа мерзімді экономикалық индикатор 6,7 пайызға өсті
АСТАНА. 14 наурыз. ҚазАқпарат - Қаңтар-ақпанда қысқа мерзімді экономикалық индикатор 6,7 пайызға өсті. Бұл туралы бүгін елордада өткен баспасөз мәслихаты барысында ҚР Статистика агенттігінің төрағасы Әлихан Смайылов мәлім етті.
«Қысқа мерзімді экономикалық индикатор биылғы жылдың қаңтар-ақпанында былтырғы жылдың қаңтар-ақпанымен салыстырғанда 6,7 пайызға өсті. Соның ішінде өнеркәсіп өндірісінің көлемі 5,6 пайызға артты. Қолданыстағы бағаларда 2 трлн 311 млрд теңгені құрады», - деді ол.
Агенттік төрағасының атап өтуіне қарағанда, кен өндіру өнеркәсібінде 4,6, өңдеу өнеркәсібінде - 7,6, электрмен жабдықтау, газ, бу беру және ауа баптауда - 5,4, сумен жабыдықтауда 2 пайыз көлемінде өсу қарқыны байқалды.
Сондай-ақ ауыл шаруашылығы жалпы өнімінің көлемі 107 млрд. теңгені құрап, өткен жылдың қаңтар-ақпанымен салыстырғанда 1,9 пайызға артқан.
