Қаңтар айында тұрғын үй нарығында баға өсті - Статистика агенттігі
АСТАНА. 8 ақпан. ҚазАқпарат /Қанат Мәметқазыұлы/ - 2011 жылғы қаңтарда тұрғын үй нарығындағы бағаның өсуі байқалды. Бұл туралы Статистика агенттігінің баспасөз қызметінен хабарланды.
Агенттіктің мәліметіне сүйенсек, 2011 жылғы қаңтарда өткен аймен салыстырғанда жаңа тұрғын үйлерді сату бағасы 1,7 пайызға көтерілген. Бұдан бөлек, көркейтілген және одан төменгі санаттағы тұрғын үйлерді алып сату - 0,5 пайызға жоғарыласа, көркейтілген тұрғын үйлерді жалға беру - 0,4 пайызға өскен.
Атап айтқанда, 2011 жылдың қаңтарында жаңа тұрғын үйлерді сатудағы 1 шаршы метрінің бағасы 146 мың 393 теңгені құраса, көркейтілген үйлердің сату бағасы шаршы метріне 106 мың 481 теңге шамасында болды.
