Қаңтар-мамырда Қазақстан халқының табиғи өсімі 99,2 мың адамды құрады

АСТАНА. 11 шілде. ҚазАқпарат - Биылғы 1 маусымдағы жағдай бойынша еліміздегі халық саны 17010,6 мың адамды құрады, соның ішінде қалалықтар - 9339,2 мың (54,9 пайыз), ауылдықтар - 7671,4 мың адамды (45,1 пайыз) құрады. Бұл туралы бүгін Астанада өткен брифингте ҚР Статистика агенттігінің төрағасы Әлихан Смайылов мәлім етті.

«2013 жылғы қаңтар-мамырда жалпы елімізде халық саны 100,8 мың адамға немесе 0,6 пайызға, ал өткен жылғы 1 маусыммен салыстырғанда 234 мың адамға немесе 1,4 пайызға өсті»,-деді агенттік басшысы.

Ағымдағы жылғы қаңтар-мамырда республика халқының табиғи өсімі (2012 ж. қаңтар-мамырда - 97 мың адам) 99,2 мың адамды құрады. Табиғи өсімнің жалпы коэффициенті 1000 адамға шаққанда 14,1 (13,9) адамды құрады.

2013 ж. қаңтар-мамырда АХАТ органдарында 159,3 мың туылғандар тіркелді, бұл былтырғы сәйкес кезеңімен салыстырғанда 0,3 пайызға артты. 1000 адамға шаққандағы туудың жалпы коэффициенті 22,6 туғандарды құрады.

Естеріңізге сала кетейік, Қазақстанның 17 миллионыншы тұрғыны 2013 жылдың 16 мамырында тіркелді.