Қаңтарда азық-түлік тауарларының бағасы 12,2 пайызға өсті - Статистика
АСТАНА. 1 ақпан. ҚазАқпарат - Ағымдағы жылғы қаңтарда азық-түлік тауарларының бағасы 2010 жылғы қаңтармен салыстырғанда 12,2 пайызға өсті, деп хабарлады ҚР Статистика агенттігінің баспасөз қызметінен.
Ведомствоның ақпаратына сәйкес, 2011 жылғы қаңтарда өткен жылдың сәйкес айымен салыстырғанда баға жармаға 55,2, жемістер мен көкөністерге - 28,2, май және тоң майға - 20,6, қантқа - 12,6, кофе, шай және какаоға - 11,4, сүт өнімдеріне - 8,8, кондитерлік өнімдерге - 8,3, тоқаш пен ұн өнімдеріне - 7,6, жұмыртқаға - 5,9, алкогольді ішімдіктерге - 4,1, ұнға - 3,6, нанға - 1,9, макарон өнімдеріне - 1,3 пайызға өскен.
Аталған кезеңде ет және ет өнімдері бағасының өсімі 15 пайызды құрады. Қой етіне баға деңгейі 15,4, құс етіне - 10,6, шұжық өнімдеріне - 10,2, шошқа етіне - 7,8, жылқы етіне - 7,5 пайызға жоғарылады.
