Қапшағайда суға батып бара жатқан Ұлыбритания азаматы құтқарылды

ҚОНАЕВ. ҚазАқпарат - Қапшағай су қоймасында жағадан 100 метр қашықтықта 49 жастағы Ұлыбритания азаматы құтқарылды, деп хабарлайды ҚазАқпарат тілшісі.

Алматы облыстық Төтенше жағдайлар департаментінің мәліметінше, 13 шілде күні сағат 18:55 шамасында Қонаев қаласының жедел-құтқару жасағының құтқарушылары суға батып бара жатқан 1973 жылы туған ер адамды байқап қалған.

«Құтқарушылар ер адамды жағаға аман-есен алып шықты, британдық азамат медициналық көмекке мұқтаж болған жоқ»,- деп хабарлады ведомстводан.

Алматы облысының ТЖД азаматтардан судағы қауіпсіздік ережелерін сақтауды сұрайды.

Бұған дейін Қапшағайда шетелдік студенттің батып кеткені туралы жазған едік.