Қар аралас жаңбыр жауады: Алматы әкімдігі тұрғындарға үндеу жасады
АЛМАТЫ. KAZINFORM — Алматы қаласында 13 қараша түннен бастап 14 қараша таңға дейін жаңбыр жауып, арты қарға ұласады, ауа температурасы минус 3 градусқа дейін төмендейді деп күтіледі.
Коммуналдық инфрақұрылымды дамыту басқармасы, қала тұрғындарына жолда кептеліс болу қаупіне байланысты қозғалыс бағытын алдын ала жоспарлауды ұсынды.
«Жауын-шашын кезінде көктайғақ болуы мүмкін, сол себепті автокөлік жүргізушілерінен машиналарының дөңгелегін ауыстырып, жылдамдықты асырмауды, арақашықтықты қатаң сақтауды, ал жаяу жүргіншілерден қауіпсіздік шараларын сақтауды сұраймыз»,- делінген хабарламада.
Алматының коммуналдық қызметі күшейтілген режимге көшті. 490 арнайы техника мен 1200 жұмысшы жұмылдырылды. Аудандық әкімдіктерде жұмыс барысын қадағалау үшін тәулік бойы кезекшілік ұйымдастырылады.
«Қазгидрометтің» болжауынша, 13 қараша түн ортасынан таңға дейін қар аралас жауын-шашын күтіледі. Түнде ауа температурасы +2 градус, күндіз +5+7 градус шамасында болады.13 қараша түстен бастап 14 қараша таңға дейін орташа, кейде қатты жауын-шашын, түнде қар жауады деп болжануда. 14 қарашада түнде және күндіз ауа температурасы минус 1-3 градусқа дейін төмендейді»,- деп ескертті әкімдіктен.
