Қарағанды облысында үш жасар баланың қазасынан кейін мәдениет үйінің жұмысы уақытша тоқтатылды
ҚАРАҒАНДЫ. KAZINFORM — Қарағанды облысының Бұқар жырау ауданындағы Ботақара кентінде тұратын әйел үш жасар ұлының үстіне сәуір айында ғимараттың қаптама кірпіші құлағаннан кейін мәдениет үйінің неліктен жұмысын жалғастырғанын түсіндіруді талап етіп отыр. Мекеменің қызметін уақытша тоқтату туралы шешім тек қазан айында, қайғылы оқиғадан кейін және ғимаратқа сараптама жүргізу кезеңінде қабылданған.
Қайтыс болған Әмірдің анасы Сәбина Кауапова Қарағанды облысының Ботақара кентіндегі Мәдениет үйінің қауіпсіздігіне қатысты жауапты органдарға көпшілік алдында сауал жолдады. Әйелдің айтуынша, ғимараттың қасбетіне қатысты оқиғаға қарамастан, мекеме келушілерді, оның ішінде балаларды да қабылдауды жалғастырған.
Қайғылы оқиға 13 сәуірде болған. Бұған дейін хабарланғандай, ғимараттың қаптама материалының бір бөлігі үш жасар баланың басына құлаған.
Салдарынан бала бас-миының ауыр жарақатын алып, медициналық мекемеге жеткізілген. Оқиғаға байланысты полиция қауіпсіздік талаптарына сай келмейтін жұмыстарды орындау немесе қызметтер көрсету фактісі бойынша қылмыстық іс қозғаған. Сол кезде аудан әкімдігі балаға қажетті медициналық көмек көрсетіліп жатқанын хабарлап, тергеу оқиғаның барлық мән-жайын және оған жауапты тұлғалардың ықтимал кінәсін анықтауға тиіс екенін мәлімдеген.
Анасының айтуынша, ауыр жарақат алғаннан кейін Әмір жансақтау бөлімінде үш ай бойы комада жатқан. Алайда баланың өмірін сақтап қалу мүмкін болмаған.
Енді әйелді мәдениет үйіне келушілердің қауіпсіздігін қамтамасыз ету шаралары неліктен ертерек қабылданбағаны алаңдатады. Оның сөзінше, оқиғадан кейінгі жарты жылға жуық уақыт аралығында мекеме жұмысын жалғастыра берген, ал қаптама материалы құлаған қауіпті аумақ тек ескерту лентасымен қоршалған.
— Осы уақыт ішінде ғимараттың қауіпсіз екені анықталып, сараптама жүргізілгенге дейін мәдениет үйінің жұмысы неге тоқтатылмады? Кірпіштің тағы біреудің үстіне құламайтынына кім кепілдік бере алады? Балалар бұл мекемеге күн сайын келіп, қауіпті аумақтың жанынан өтеді. Олардың қауіпсіздігін қамтамасыз ету үшін қоршау лентасы жеткілікті ме? — деп ашынады қаза тапқан баланың анасы.
Сәбина Кауапованың айтуынша, оған мәдениет үйін жабу мүмкін емес деп түсіндірген. Әйел басқа балалардың өмірі мен денсаулығына қауіп төндірмеу үшін мекеменің жұмысын тым болмаса уақытша тоқтатуды сұраған.
Ол құзырлы органдардан мекеме қызметінің неліктен ертерек тоқтатылмағанын түсіндіруді және тиісті шаралардың қабылдануына қол жеткізу үшін қайда жүгіну керектігін айтуды сұрап отыр.
Бұқар жырау ауданының мәдениет және тілдерді дамыту бөлімінің басшысы Мейірлан Қали Ботақара кентіндегі мәдениет үйінің қызметі аудандық полиция бөлімінің 2026 жылғы 14 қазандағы қаулысы негізінде уақытша тоқтатылғанын хабарлады.
— Ғимараттың қасбетінен қаптама материалының құлауына байланысты орын алған қайғылы оқиғаға орай аудандық мәдениет және тілдерді дамыту бөлімінің қарамағындағы Ботақара кентіндегі мәдениет үйінің қызметі аудандық полиция бөлімінің 2026 жылғы 14 қазандағы қаулысы негізінде уақытша тоқтатылды. Қазіргі уақытта ғимараттың техникалық жай-күйіне сараптамалық тексеру жүргізіліп жатыр. Сараптама қорытындысы алынғанға дейін қызметкерлер мен басқа да азаматтардың ғимаратқа кіруіне толық тыйым салынды, — деді Мейірлан Қали.
Қазір ғимарат сараптама қорытындысы алынғанға дейін жабық болады. Сараптама нәтижелері мен мекеменің алдағы тағдыры туралы әзірше ақпарат жоқ.
