Қарағандылық студенттер әлем чемпионы атағына таласады
17-20 қазан аралығында Утрехт (Нидерланд) қаласында 33 елдің қатысуымен өтетін ENACTUS WORLD CUP 2023 әлем кубогында Қазақстанның намысын Е.Бөкетов атындағы Қарағанды университетінің студенттері қорғайды, деп хабарлайды Kazinform.
ENACTUS WORLD CUP – әлемнің 33 елінен қатысатын студенттердің, кәсіпкерлердің, академиялық және бизнес көшбасшыларының халықаралық платформасы Enactus-тың кәсіпкерлік қызмет арқылы әлеуметтік прогреске қалай ықпал ететінін көрсету үшін біріктіретін іс-шара. Студенттердің жобасы БҰҰ тұрақты дамуының 17 мақсатына қол жеткізуге бағытталған. Презентацияларды Халықаралық бизнес көшбасшыларының тобы бағалайды.
Қазақстандық студенттер пластикті қайта өңдеудің инновациялық әдісін тауып және пайдаланылған паллеттерден ыңғайлы жиһаз жасап, әлеуметтік бизнес құрды. Сондай-ақ мүмкіндігі шектеулі жандар өндірістік циклдің басты қатысушылары болған. Кәсіпкерлік көшбасшылықты таңыта отырып, студенттер тұрақты өмірге жол салды.
«ENACTUS World Cup 2023 Студенттік кәсіпкерліктің әлемдік кубогы – Қазақстанның дарынды жастары мен әлеуметтік жауапты бизнес үшін бірегей мүмкіндік», - деді философия ғылымдарының докторы, ENACTUS Kazakhstan президенті Альбина Меирбекқызы.
ENACTUS (бұрынғы SIFE) – әлемнің 33 елінен 1800 университет қатысатын бизнес, инновация және практикалық дағдыларды оқытудың халықаралық бағдарламасы. Жыл сайын Қазақстанның 19 өңірінен 2 500-нан астам студент пен оқушы 100-ден астам жобаны іске қосу арқылы халықтың әлеуметтік осал топтары үшін 1 000 жұмыс орнын құрады.