17:27, 25 Желтоқсан 2020

Қарағанды мектебі ел Президентінен сыйлық алды

ҚАРАҒАНДЫ. ҚазАқпарат – Қарағандыдағы №104 мектеп-гимназиясы Жаңа жылқарсаңында Қазақстан Президентінің атынан сыйлық алды. Мемлекет басшысы Қасым-Жомарт Тоқаев қараша айында Қарағанды облысына жұмыс сапары барысында жаңа оқу орнына келген болатын. Сол кезде оқушылар мектеп автобусы болса деген ниетін білдірген еді. Енді міне олардың арманы орындалды, деп хабарлайды ҚазАқпарат тілшісі.

Балаларға арналған жайлы автобус желтоқсан айында Саран қаласында ашылған QazTehna жаңа зауытында құрастырылған. Мемлекет басшысының атынан сыйлықты табыс ету жас жұмысшыларға жүктелді.

«Біз командамызбен осы мектеп автобусын құрап, жинадық. Менің ойымша, бұл

балаларға арналған тамаша жаңажылдық сыйлық. Біздің зауытта автомобиль жасаудың әлемдік көшбасшысы болып табылатын Yutong маркалы заманауи автобустар өндірісі басталды. Облыста осындай кәсіпорынның ашылғанына қуаныштымын. Енді Саран және оған жақын орналасқан қалалардың тұрғындары үшін жаңа жұмыс орындары ашылды, сондай-ақ отандық машина жасауды дамытуға ықпал ететін болады. Мұнда көптеген жас мамандар жұмысқа орналасты. Мен Қарағанды техникалық университетінің көлік-жол факультетін бітіріп, енді

мамандығым бойынша жұмыс таба алдым», - дейді слесарь-құрастырушы Жарас

Исабеков.

Гимназияның ауласында автобусты оқушылар, педагогтар мен ата-аналар қарсы алды.

Барлық оқушылар атынан 11-сынып оқушысы Іңкәр Құлмағамбетова алғыс білдірді.

«Ел Президенті қараша айында біздің мектепке келді. Мен онымен жеке сөйлесуге

мүмкіндік алдым. Біздің мектеп оған өте ұнады. Президент бізге не қажет екенін сұраған болатын. Шынымды айтсам, біз бірден жауап бере алмадық, өйткені біз үшін көп нәрсе жасалды - барлық мүмкіндіктер бар. Біз мектеп автобусын сұрадық, себебі бәріне қоғамдық көлікпен жүру ыңғайсыз», - деді Іңкәр.

Аталмыш мектеп-гимназияда 900 бала оқиды. Оқу ордасының директоры Жадыра

Баймолдинаның айтуынша, автобус байқауларға, жарыстарға және экскурсияларға бару үшін пайдаланылады. Сондай-ақ, «Күнгей» шағынауданында тұратын оқушыларды мектепке және үйлеріне жеткізеді.

«Бізде гуманитарлық бағыттағы мектеп-гимназия бар. Барлық жағдай жасалған, оқушыларды қосымша біліммен де қамти аламыз. STEM-зертханасы, робототехника және интеллектум кабинеттері, телестудия және медиаорталық, ART-студия және хореография залы бар», - деп атап өтті директор.