Қарағанды музыкалық комедия театры тұрғындарды жаңа маусымның ашылуына шақырды

ҚАРАҒАНДЫ. ҚазАқпарат – Қарағанды академиялық музыкалық комедия театрының жаңа маусымының ашылуы 16 қыркүйек сағат 18:30-да Кеншілер мәдениет сарайының сахнасында өтеді, деп хабарлайды ҚазАқпарат тілшісі.

Бұл күні көрермендер ұзақ үзілістен кейін әлемдік классика жауһары – Имре Кальманның «Сильва» опереттасын тамашалай алады.

«Спектакльді 2005 жылы Ресей Федерациясының еңбек сіңірген өнер қайраткері, Санкт-Петербургтен келген режиссер Юрий Александров қойды. Қоюшы балетмейстер - Марина Лепилина, Сценография және костюмдер бойынша РФ еңбек сіңірген суретшісі Вячеслав Окунев жұмыс істеді», – делінген хабарламада.

Опереттада театрдың жетекші солистері Елена Филинкова, Денис Кудряшов және Александр Бойко, сондай-ақ хор мен балет әртістері жұмыс істейді. Спектакль симфониялық оркестрдің сүйемелдеуімен, бас дирижер Рафаэль Хамзин жетекшілік етуімен өтеді.