Қарағанды облысы Индустрияландыру картасына қосуға жаңа жобалар ұсынуда
ҚАРАҒАНДЫ. 23 желтоқсан. ҚазАқпарат /Валентина Елизарова/ - Бейсенбі күні Қарағанды облыстық әкімдігінде аймақ басшысы Серік Ахметовтың төрағалығымен Үдемелі индустриялық-инновациялық даму жөніндегі үйлестіру кеңесінің мәжілісі өтті.
Онда Индустрияландыру картасына қосуға ұсынылып отырған жаңа инвестициялық жобалар қаралды.
«21 желтоқсанда ел Президентіне Үдемелі индустриялық-инновациялық даму бағдарламасының аясында жүзеге асырылып жатқан барлық облыстың инвестициялық жобалары таныстырылды. Қарағанды облысында ағымдағы жылы 9 жоба жүзеге асырылды. Дегенмен біздің аймақ өнеркәсіптік кәсіпорындар мен ауыл шаруашылығы өнімдерін өңдеу жөніндегі кәсіпорындарды дамытудың үлкен әлеуетіне ие»,- деп атап көрсетті С.Ахметов өз сөзінде.
Облыс әкімінің баспасөз қызметінен хабарлағандай, бүгінгі мәжілістің қорытындысы бойынша аймақтық Индустрияландыру картасына қосуға екі жоба ұсынылды. Олар: «ҚазАвиаСпектр» ЖШС-нің ауыл шаруашылығы мақсатындағы ұшақтардың сериялық өндірісін ұйымдастыру жобасы мен «Айқын Жол» ЖШС-нің гофрланған металл құрылғылар шығаратын өндіріс жобасы.
Облыс әкімі аталмыш жобаларды келісу үшін Индустрия және жаңа технологиялар министрлігіне жолдау туралы тапсырма берді.
