Қарағанды облысы су тасқынына дайындалып жатыр
ҚАРАҒАНДЫ. ҚазАқпарат - Қарағанды облысында қардың деңгейін өлшеу жұмыстары жүргізіліп жатыр, деп хабарлайды өңір басшысының ресми сайты.
«Қазгидромет» мекемесінің облыстық филиалының және Төтенше жағдайлар департаментінің қызметкерлері Нұра және Шерубай-Нұра өзендерінің бойымен Қарқаралы, Шет және Бұқар жырау аудандарын аралап шықты.
ТЖД таратқан ақпаратқа сай Қарағанды облысы бойынша Калинина, Матақ, Бесоба, Қызылтау, Қамқор, Ақөре, Керней, Шешенқара, Аққұдық, Тоғызқұдық, Қушоқы, сондай-ақ «Жосалы» шипажайы мен «Өгізтау» қыстағының маңында қардың қалыңдығын өлшеу жұмыстары жүргізілді.
- Аралау жұмыстары 12 бақылау нүктелері бойынша өткізілді. Ол үшін ТЖД-нің «ТРЭКОЛ» жол талғамайтын көлігі пайдаланылды. Маршруттың жалпы ұзындығы 1350 шақырымды құрады. Өлшеу жұмыстары қардағы судың деңгейі қазір шекті бірліктен төмен екенін көрсетті, - дейді Қарағанды облыстық Төтенше жағдайлар департаментінің баспасөз хатшысы Жанна Дәуренбекова.
