Қарағанды облысынан елордадағы жәрмеңкеге 600 тоннадан астам өнім әкелінеді

НҰР-СҰЛТАН. ҚазАқпарат - 5-6 қазан күндері Нұр-Сұлтан қаласында Қарағанды облысының ауыл шаруашылығы өнімдерінің жәрмеңкесі өтеді. Жермеңке аясында «Бауырсақ және қымыз» фестивалі ұйымдастырылады, деп хабарлайды елорда әкімдігінің ресми сайты.

Атап айтқанда, алдағы демалыста «Хан Шатыр» сауда ойын-сауық орталығының жанында Қарағанды облысының ауыл шаруашылығы өнімдерінің жәрмеңкесі өтеді. Жәрмеңкеге өңірдің 9 ауданы мен 4 қаласынан 80 шаруа қожалығы мен қайта өңдеу кәсіпорындары өз өнімдерін ұсынады. Сауда сөрелерінде барлығы 600 тоннадан астам өнім сатылады. Оның ішінде: 100 тоннадан астам ет және ет өнімдері, 15 тонна сүт өнімдері, 360 мың дана жұмыртқа, 5 тонна балық және 16 тоннадан астам басқа да өнімдер әкелінеді.

Сонымен қоса, ауыл шаруашылығы жәрмеңкесін өткізу аясында «Бауырсақ және қымыз» фестивальдері ұйымдастырылып, келушілер назарына өңірдің шығармашылық ұжымдарымен концерттік бағдарлама ұсынылады.