Қарағанды облысында 1,3 мың шақырым автожол жөнделеді
АСТАНА. ҚазАқпарат – Биыл Қарағанды облысында 1 374 шақырым автожол жөндеу жұмыстарымен қамтылады. Бұл туралы өңір әкімі Ермағанбет Бөлекпаев Орталық коммуникациялар қызметіндегі баспасөз мәслихатында мәлім етті, деп хабарлайды ҚазАқпарат тілшісі.
«Қарағанды облысында 1 374 шақырым автожол жөндеу жұмыстарымен қамтылады. Бұл – 640 шақырым республикалық маңызы бар автожолдар, 317 шақырым облыстық маңызы бар автожолдар және 417 шақырым жергілікті желілер. 3 мыңға жуық жол-құрылыс техникасын іске қосу, 570 жұмыс орнын құру жоспарлануда. Нәтижесінде нормативтік жағдайдағы жолдардың үлесі 92 пайызға дейін жеткізілетін болады», - деді Қарағанды облысының әкімі.
Оның атап өтуінше, «Орталық-Оңтүстік» ауқымды жобасын қоса алғанда, жол инфрақұрылымын жақсарту бойынша жұмыстар жалғасады. Биыл Қарағанды – Балқаш республикалық автожолының төрт жолағы бойынша жол ашылады. Қарағанды – Қарқаралы жолының бес учаскесіне орташа жөндеу жұмыстары жүргізіледі.
«Сондай-ақ жақын арада Қарағанды –Жезқазған автожолын қайта жаңартуға кірісеміз. Жоба үш жылға есептелген», – деді Ермағанбет Бөлекпаев.
