Қарағанды облысында Әулие Ата үңгірі жазулар мен граффитиден тазартылды
Бес ай аралығында педагогтар тынымсыз еңбектенді. Ізгі істің аяқталғаны туралы жоба бастамашысы облыстық мәслихаттың депутаты Айман Түкбаева өзінің Facebook-тегі парақшасында айтып берді, деп хабарлайды ҚазАқпарат тілшісі.
Бектау Ата тауы мен үңгірі Шарын шатқалы, Хан Тәңірі шыңымен қатар республикалық киелі нысандар мен басқа да ерекше қастерленетін табиғи мұра ескерткіштерінің картасына кіреді. Ерекше жартастардан басқа, Шатқал Әулие Ата үңгірімен әйгілі. Ол 600 метр биіктікте орналасқан. Тереңдікте үңгір қасиетті деп саналатын сумен толтырылған. Ғасырлар бойы қазақтар мұнда аурудан айығу үшін дұға етуге келген.
Екі жыл бұрын қазақстандық желілерде туристер жазған жартастар бейнеленген фотолар жариялана бастады. Жергілікті тұрғындардың айтуынша, алғашқы жазулар өткен ғасырдың 30-жылдарында пайда бола бастаған. 90 жыл ішінде үңгір қаланың ұсқынсыз бір ауданы іспеттес болып, келбетін жоғалтқан.
2020 жылы Шашубай кентінің бөбекжай кешені базасындағы тірек мектебінің (Ресурстық орталықтың) педагогтары, қызметкерлері мен техникалық персоналы Әулие Ата киелі үңгірін тиісті қалыпқа келтіру туралы шешім қабылдады. Жұмысқа кіріспес бұрын еріктілер практиктердің кеңестерін зерттеп, көптеген тәжірибелік эксперименттерді тікелей үңгірде сынақтан өткізді. Дайындық кезеңі үш айға созылды.
«Әулие Ата үңгірін іс жүзінде тазарту бес айға созылды: 2020 жылдың тамыз, қыркүйек, қазан және 2021 жылдың сәуір, мамыр айлары», – деп жазады Айман Түкбаева.
– Демалыс және мереке күндері біздің ер азаматтарымыз жаны мен жүрегінің қалауымен Бектау Ата шатқалына барып, үңгірді тазартты. Үңгірге бір ғана көтерілу үшін олар өздерімен жүз бір рет қолданылатын және екі тұрмыстық оттегі баллонын, дизельді шағын автономды генераторлық электр станциясын, электр щеткалары мен кескіштерін, өрт сатыларын, туристік жабдықтар мен арқандарды, отпен жұмыс істеудегі жеке қауіпсіздік заттарын, құрылыс құралдарын алып жүрді. Сонымен қатар әркімде рюкзактар болды. Осылайша бес ай бойы жұмыс істедік. Бұл Шашубайдың нағыз жігіттері!»
«Рухани жаңғыру» аясындағы акция ресми түрде 6 тамызда аяқталды. Үңгірге бағыт бойынша жұмыстар аяқталғаннан кейін үш тілде – мемлекеттік, орыс және ағылшын тілдерінде ақпараттық баннерлер орнатылды. Сондай-ақ, акция туралы «Табиғат мінсіз таза, мін бізде ғана» деген жазуы бар ескерткіш тақта орнатылды.
