Қарағанды облысында егін ору науқаны 1 қыркүйекте басталады

ҚАРАҒАНДЫ. ҚазАқпарат – Қарағанды облысында кейбір өсімдік шаруашылықтары астық, картоп және көкөніс жинауға кірісті. Жаппай науқан 1 қыркүйекте басталады, деп хабарлайды ҚазАқпарат тілшісі.

Күзгі дала жұмыстарына дайындық туралы аппараттық кеңесте ауыл шаруашылығы басқармасының басшысы Асқар Санаубаров баяндады.

Оның айтуынша, жем дайындау аяқталуда. Қазірдің өзінде қажетті шөп қорының 90%-ға жуығы бар. Сонымен қатар, пішендеме дайындалды.

«Биыл дәнді дақылдарды жинау алаңы 920 мың га, майлы дақылдар – 58,4 мың га, картоп – 11 507 га және көкөністер – 1 436 га құрайды, астықтың орташа өнімділігі 8,6 ц/га деңгейінде күтілуде, барлық қажетті техника дайын», – деп хабарлады Асқар Санаубаров.

Өсімдік өсірушілерге тыңайтқыштардың, тұқымдардың, пестицидтердің құнын, суармалы суды жеткізу шығындарын өтеуге 4,8 млрд теңге субсидия төленді. Ауыл шаруашылығы кәсіпорындары Аграрлық несие корпорациясы арқылы қаржылай көмек алды. Арзандатылған бағамен дизель отыны бөлінді.

Дәнді дақылдарды жаппай жинауды 1–25 қыркүйек аралығында өткізу жоспарлануда. Картопты жинау 30 қыркүйекке дейін аяқталуы тиіс.