Қарағанды облысында көліктердің өртенуіне ұласқан жол апатында алты адам қаза тауып, екі бала ауруханаға жеткізілді
ҚАРАҒАНДЫ. Тамыздың 14-і. ҚазАқпарат /Валентина Елизарова/ - Қарағанды облысының Нұра ауданында жұма, тамыздың 13-інде жол апаты орын алып, оның салдарынан алты адам қаза тауып, екеуі түрлі дене жарақаттарын алды,
деп хабарлайды облыстық ІІД баспасөз қызметі.
«Тамыздың 13-інде сағат 13.50 кезінде Киевка ауылынан 5 шақырым жердегі «Киевка-Теміртау» көлік жолында «Опель-Вектра» автокөлігінің әзірге анықталмаған жүргізушісі Теміртау қаласына барар жолда қарсы жолға шығып кетіп, Ақмола облысының 43 жастағы тұрғынына тиесілі «ВАЗ-2106» автокөлігіне соқтығысты. ЖКО кезінде екі көлік те толықтай жанып кетті», - деп хабарлайды облыстық ІІД баспасөз қызметінен.
«Опель-Вектра» автокөлігінің ішінен отқа күйген екі мәйіт, ал көлік жанынан отқа жанып кеткен бір мәйіт табылды. «Ал «ВАЗ-2106» автокөлігінің ішінен екі адамның от шарпыған мәйіті табылды, қаза тапқандар 33 жастағы әйел мен 8 жасар қыз бала. Жүргізуші ауруханаға барар жолда қайтыс болды. Екі жолаушы: 13 және 5 жасар екі бала Киевка ауылының аудандық дәрігерлік бірлестігіне түрлі дене жарақаттарымен жеткізілді», - делінген облыстық ІІД баспасөз қызметі таратқан мәліметте.
