Қарағанды облысында көмір мәселесін реттейтін штаб құрылды

ҚАРАҒАНДЫ. ҚазАқпарат - Қарағанды облысында қатты отынның тасымалдануы мен баға саясаты бойынша жағдайды реттеу мақсатында арнайы штаб құрылды, деп хабарлайды «ҚазАқпарат» ХАА тілшісі.

Облыс әкімі Ерлан Қошановтың айтуынша, өңірде республика тұрғындарының қажеттілігіне 9 айда 2 миллион тонна көмір жөнелтілген, бұл 2016 жылдың осы кезеңімен салыстырғанда 18%-ке көп. Өңірге негізгі көмір жеткізуші - «Шұбаркөл көмір» АҚ-пен қауырт жағдайды реттеу мақсатында қосымша шаралар қарастырылған.

Облыста Қазақстан Премьер-Министрінің республика нарығына тәуліктік көмір шығару көлемін арттыру жөніндегі тапсырмасы орындалды. Техника көбейтіліп, вагондар саны 140-тан 180-ге дейін жеткізілген.

«Жалпы, көмір жеткілікті мөлшерде, вагон мәселесі де шешілді. Астанаға тәулігіне 25 вагон көмір жөнелтіліп жатыр, бұл тұрғындардың көмірге деген сұранысын қанағаттандыруға жетеді», - деді өңір басшысы. Облыс тұрғындарын көмірмен қамтамасыз ету мәселесі де реттелген, тәулік сайын көмір тасымалдап жатқан 60 вагон ең алдымен шалғай қалалар мен аудандарға барады.