Қарағанды облысында меморгандардың 11 басшысының үстінен қылмыстық іс қозғалды
ҚАРАҒАНДЫ. ҚазАқпарат - Қарағанды облысында биыл жыл басынан бері мемлекеттік органдардың 11 басшысы сыбайлас жемқорлық әрекетке барғаны үшін жауапқа тартылды, деп хабарлайды ҚазАқпарат тілшісі.
Сыбайлас жемқорлыққа қарсы қызмет бюджеттен мемлекеттік бағдарламаларды жүзеге асыру үшін бөлінген қаражаттарды тұрақты түрде қадағалап отырады. 2018 жылдың басынан бері сыбайлас жемқорлыққа қатысты 33 тұлға қылмыстық жауапқа тартылды, соның 11-і түрлі деңгейдегі мемлекеттік органдардың басшылары.
«9 сәуірде Қарқаралы аудандық соты Қарқаралы ауданының тұрғын үй-коммуналдық шаруашылық, жолаушылар көлігі және автомобиль жолдары, құрылыс, тұрғын үй инспекциясы бөлімінің басшысын 6 жылға бас бостандығынан айырды. Ол 2016 жылы «Нұрлы жер» бағдарламасы бойынша Қарқаралының инженерлік-коммуникациялық инфрақұрылымын дамытуға бөлінген 52 млн теңге мөлшеріндегі бюджет қаражаттарын жымқыруға қатысқан», - дейді Сыбайлас жемқорлыққа қарсы іс-қимыл ұлттық бюросының Қарағанды облысы бойынша департаменті басшысының орынбасары Ерқанат Есенов.
Биыл қаңтар айынан наурызға дейін 66 қылмыстық құқықбұзушылық тіркеліп, соның 47-сі сыбайлас жемқорлыққа қатысты қылмыстар болған. Қазіргі кезде 40 қылмыстық іс сотқа берілді.
Ал мемлекеттік бағдарламаларды орындау аясында 11 факт, атап айтқанда «Нұрлы жер» бағдарламасы бойынша - 3, 2016-2019 жылдарға арналған «Денсаулық» бағдарламасы бойынша - 1, 2016-2019 жылдарға арналған ғылым-білімді дамыту бағдарламасы бойынша - 2, ал тілдерді дамыту бағдарламасы бойынша - 5 құқықбұзушылық анықталған.
Облыстық департамент өкілдерінің айтуынша, соның салдарынан мемлекетке жалпы 87,5 млн теңге зиян келтіріліп, соның 78,3 млн теңгесі қайтарылған.
