Қарағанды облысында «Жасөспірім» шарасы барысында міндетін дұрыс орындамағаны үшін 67 ата-ана жауапкершілікке тартылды
ҚАРАҒАНДЫ. ҚазАқпарат - Қарағанды облысында «Жасөспірім» жедел-алдын алу шарасын өткізген алты күн ішінде полицейлер ата-ана міндетін адал орындамаудың 70-ке жуық фактісін анықтаған. Бұл туралы облыстық ІІД баспасөз қызметінен хабарлады.
«Жеткіншектердің ата-аналары заңды бұзды. 6 күн ішінде ҚР ӘҚК 127 бабы бойынша баланы тәрбиелеу міндеттерін орындамағаны үшін 67 әкімшілік материал толтырылды», - делінген хабарламада.
Сонымен қатар, кәмелет жасқа толмағандарға қатысты 18 қорғау нұсқауы шығарылды.
Кәмелетке толмағандарға алкоголь және темекі өнімдерін сатудың 87 факті анықталды.
Ведомство ақпаратынша, түрлі құқықбұзушылықтарға барғаны үшін 338 кәмелетке толмаған жеткіншек полиция бөліміне жеткізілді. 214 жасөспірім түнгі уақытта ересектердің бақылауынсыз далада серуендеп жүрген жерінен ұсталды. 26 кәмелетке толмаған жасөспірім ұсақ бұзақылық жасап жатқан кезінде қолға түсті.
«Жасөспірім» жедел-алдын алу шарасы облыста 1 және 10 сәуір аралығында өтеді.
