Қарағандыда 10 тұрғын үй кешенінің құрылысы тоқтатылды
ҚАРАҒАНДЫ. ҚазАқпарат – Қарағандыда сот шешімімен 10 тұрғын үй кешенінің құрылысы тоқтатылды. Құрылыс салушылар рұқсат құжаттарынсыз жұмысқа кіріскен. Жоспардан тыс тексеруді Мемлекеттік сәулет-құрылыс бақылауы басқармасы жүргізді, деп хабарлайды ҚазАқпарат тілшісі.
«Деректер бізге берілген соң, 10 компанияға жоспардан тыс тексеру жүргізіп, заң бұзушылықтар туралы сотқа шағым түсірдік. Құрылыс салушылар ҚР ӘҚБтК-нің 314-баб «Жобалық құжаттамасыз құрылыс», 321-бабы «Авторлық-техникалық қадағалаусыз құрылыс жүргізу» және 463-бабы «МСҚБ талон-хабарламасысыз құрылыс жүргізу» бойынша әкімшілік жауапкершілікке тартылды. Барлығына айыппұл салынды», - деді Мемлекеттік құрылыс инспекторы Думан Қасымжанов.
Егер ескертулер жойылмаса, нысан пайдалануға жіберілмейді және ол қабылдау актісін алмайды.
Рұқсатсыз құрылыс салушылар тізіміне келесі компаниялар кірді:
- «T-K Building» ЖШС («Al-Farabi» ТК);
- «TT INVEST-2022» ЖШС («Хан ТК);
- «Satti Lux Stroy» ЖШС («Нұра» ТК);
- «Baiterek-2022» ЖШС («Аманат» ТК);
- «СМК Group» ЖШС («Baiterek» ТК);
- «Григорян Ш.Н.» ЖК (КТ);
- «TBL building» ЖШС («Tole Bi 2» КТ);
- «Revival Alliance» ЖШС (Ержанов к-сі, 63/2);
- «ККК Бетон» ЖШС («Бақытты отбасы» ТК);
- «Optima-Stroy» ЖШС («Династия» ТК).
Экономикалық сотта қазір 3 тұрғын үй кешенін «өз еркімен салу» деп тану туралы талап-арыздар бар. Бұл – «Al-Farabi», «Хан» және «Нұра» тұрғын үй кешендері.
Сондай-ақ, үлескерлердің қаражатын заңсыз тартқаны үшін 15 компанияға 320-бап бойынша айыппұл салынды. @gaskkrg Instagram әлеуметтік желісінде толық тізім келтірілген. Қазір МСҚБ қарауында осындай заң бұзушылықтар тіркелген тағы екі компания бар.
