Қарағандыда адамды қағып кеткен автобус жүргізушісі 5 жылға сотталуы мүмкін
ҚАРАҒАНДЫ. ҚазАқпарат – Жаяу жүргіншілер жолында әйелді қағып кеткен автобус жүргізушісіне қатысты сотқа дейінгі тергеу жүріп жатыр, деп хабарлайды ҚазАқпарат тілшісі.
Қарағанды облысының полиция департаментінің хабарлауынша, адам өліміне кінәлі жүргізуші бес жылға дейін бас бостандығынан айырылуы мүмкін.
«Автобус жүргізушісіне қатысты ҚК 345-бабының 3-бөлігі бойынша сотқа дейінгі тергеу басталды. Қазіргі уақытта тиісті сараптамалар тағайындалып, тергеу жүргізілуде», - делінген хабарламада.
Естеріңізге сала кетейік, 29 қаңтарда қалалық автобус жүргізушісі 62 жастағы әйелді жаяу жүргіншілер жолында қағып кеткен. Зардап шеккен әйел ауруханада көз жұмды.
