Қарағандыда биыл 2 мыңға жуық ағаш отырғызылады
ҚАРАҒАНДЫ. ҚазАқпарат – Қарағандыда Орталық саябақта облыстық Қазақстан халқы Ассамблеясының аллеясы пайда болды. Өңірдің барлық аймақтарында көктемгі ағаш оырғызу жүріп жатыр, деп хабарлайды ҚазАқпарат тілшісі.
Жасыл сенбілікке қоғам белсенділерімен бірге облыс әкімі Ермағанбет Бөлекпаев шықты. Қалада осы көктемде 2000-ға жуық ағаш отырғызылады. Өңірдің барлық аймақтарында жаппай көктемгі ағаш отырғызу басталды.
«Барлық қалалар мен аудандарда ағаш отырғызу жүріп жатыр. Қарағандыда көктемде 2000-ға жуық ағаш отырғызылады. Бүгін біз саябаққа этномәдени бірлестіктердің басшыларымен бірге жиналдық. Бұл жерде аллеяны облыстық Қазақстан халқы Ассамблеясы өз қамқорлығына алды. Бастаманы қолдағандарыңыз үшін рахмет. Саябақ көркем әрі жайлы болуы үшін көгалдандыруды жалғастырамыз», – деді Ермағанбет Бөлекпаев.
Саябақтың бұл бөлігін дамыту жоспарлануда. Қала әкімі Мейрам Кожуховтың айтуынша, биыл мұнда тегін үлкен балалар алаңы салынады.
«Әрбір отырғызылған ағаш – болашаққа салған үлесіміз, келесі ұрпаққа қамқорлық. Біздің Ассамблеяға әрқашан жасампаздық тән болған. Саябақты барлық қарағандылықтар жақсы көреді. Менің ойымша, біз оны бірге көгалдандырып, көрікті ете аламыз. Баршаңызды туған қаламызға өз үйіңізге сияқты қарауға шақырамын – оның болашағына немқұрайлы қарамаңыздар, игі істермен өз үлестеріңізді қосыңыздар», – дейді корей ұлтының облыстық этномәдени бірлестігінің төрағасы Лилия Ким.
Сол күні саябақта ҚР ІІМ Б. Бейсенов атындағы Қарағанды академиясының курсанттары сенбілік өткізіп, қоқысты тазартуға көмектесті.
Саябақты көгалдандыруға кәсіпкерлер де қатысады. Мысалы, компаниялардың бірі жөке көшеттерін отырғызды. Жасыл кеңістіктерге күтім жасау үшін саябақтар басқармасы су таситын көліктер сатып алды.
