Қарағандыдағы сары ауру үйде дайындалған сусыннан пайда болған
ҚАРАҒАНДЫ. ҚазАқпарат - Қазақстанның бас мемлекеттік санитарлық дәрігері Жандарбек Бекшин Қарағандыдағы мектеп оқушыларының арасында А гепатитінің ошағы үйде әзірленген сусыннан екенін айтты, деп хабарлайды «ҚазАқпарат» ХАА тілшісі.
Денсаулық сақтау министрлігінің Қоғамдық денсаулықты сақтау комитетінің төрағасы Ж. Бекшиннің айтуынша, сусынды Жаңа жыл мерекесі қарсаңында №58 мектептің жетінші сынып оқушысы әкелген.
«Үйде әзірленген азық-түлік өнімі - ауру содан туған. Одан кейін вирус балаларға жұға берген», - дейді Жандарбек Бекшин Қарағандыдағы баспасөз конференциясында.
Мәліметтерге қарағанда, инфекция жұқтырған қарағандылықтардың саны 51 адамға жеткен, соның 34-і балалар.
Қарағанды, Теміртау және Шахтинскідегі үш мектептің оқушыларына жоспардан тыс дәрі егу басталды. Денсаулық сақтау басқармасы оған 2 000 доза дәрі сатып алған.
Дәрігерлер крандағы суды қайнатпай ішпеу қажеттігін айтып жатыр, сондай-ақ қолды жақсылап жуып жүру керек.
Қазіргі кезде облыстағы орта мектептердің барлығында сары аурудың таралуының алдын алу бойынша шаралар жүргізіліп, асханалар, дәліздер, сынып бөлмелері, дәретханаларды дезинфекциялап жатыр.
