Қарағандылық футболшылар бүгін Албания чемпионымен кездеседі
АЛМАТЫ. 6 тамыз. ҚазАқпарат - Қарағандының «Шахтер» футбол командасы бүгін Албанияның Тирана қаласында Корча қаласының «Скендербеу» командасымен УЕФА Чемпиондар лигасының үшінші дәрежелік раундындағы екінші матчын өткізеді.
Бұған дейін олар Астанада өткен алғашқы матчта қарсыластарын 3:0 есебімен ойсырата ұтқан болатын. Қарағандылықтардың бас бапкері Виктор Кумыков бұл ойында өз басымдығын сақтап қалса, ел тарихындағы Чемпиондар лигасының плей-офф кезеңіне командасын алып шыққан тұңғыш бапкер атанбақ.
Жексенбі күні Қазақстан Премьер-лигасының 22-ші турында турнир кестесінің соңында келе жатқан Оралдың «Ақжайығын» 4:0 есебімен жеңген қарағандылықтар қазір үшінші орында тұр. Олар көш басындағы «Ақтөбеден» - 12, «Астанадан» 6 ұпайы кем. Ал өзін өкшелеп келе жатқан Павлодардың «Ертісінен» - 1, Алматының «Қайратынан» 4 ұпайы артық.
Корчалықтар болса, қазір 2012/2013 жылғы Албания чемпионатында 26 турдың қорытындысы бойынша 14 команданың арасында 58 ұпаймен турнир кестесінде көш бастады. Олардың үздік бестіктегі «Кукесиден» - 6, «Теутадан» - 10, «Фламуртариден - 12, «Тиранадан» 15 ұпайы артық.
