Қарағандылықтар жаңажылдық тірі шыршаларды хайуанаттар бағына тапсырып жатыр

ҚАРАҒАНДЫ. ҚазАқпарат - Қарағандылықтар жаңажылдық мереке күндері үйлерін безендірген тірі шыршаларды хайуанаттар бағына тапсырып жатыр. Бұл туралы облыс әкімдігінің ресми сайтында хабарланды.

Атап өтілгендей, онда қылқан жапырақтылар пайдаға жаратылады - бұталармен жануарлардың үйшіктері жылытылатын болады.

«Әдетте, шыршаларды далаға лақтырып жібереді, контейнерлер алаңқайлары қоқысқа толып кетеді. Алайда, бұл керексіз болып қалған шыршаларды хайуанаттар бағына қайта өңдеуге тапсырып, қаламыздың экологиясын қорғап қалуға болады емес пе?! Ол үшін шыршаларды қабылдау бекетіне алып келіп тапсыру қажет. Біз шыршаларды әшекейлер және жылтырақтарсыз қабылдаймыз. Аязды күндері бұл бұталармен жыртқыш аңдардың үйшіктерін жылытамыз», - дейді хайуанаттар бағының қызметкерлері.

Шыршаларды хайуанаттар бағына күн сайын 9.00-ден 18.30-ға дейін Ермеков көшесі, 111 мекенжайы бойынша алып келуге болады.