Қарақалпақстанда Көрісу күні тойланды
НӨКІС. ҚазАқпарат - Өзбекстанның Қарақалпақ автономиялы республикасы Әжінияз атындағы Нөкіс мемлекеттік педагогика институтында «Амал мерекесі – Наурыз жаршысы» атты кеш өтті. Бұл туралы Қарақалпақстан хабар агенттігінің тілшісі Ислам Матеков хабарлады.
Қазақ халқының ұлттық мейрамдарының бірі Көрісу күнін Наурыздың басталуы ретінде Өзбекстандағы көп ұлт, соның ішінде туысқан қарақалпақ халқы да тойлайды.
Білім ордасында өткен әдеби кешті институт проректоры П.Калханов ашып, жиналғандарды Амал мерекесі және Наурыз мейрамымен құттықтады.
Шарада көпке қазақ халқының ұлттық тағамдары тартылып, институттың түркі тілдер факультетінің қазақ тілі мен әдебиеті кафедрасы профессор-оқытушылары және студенттері әдеби-көркем бағдарлама ұсынды.
Әсіресе қазақ халқының ұлттық әдет-ғұрыптары, соның ішінде қыз ұзату, беташар көптің көңілінен шықты. Шара соңы ән кешіне ұласты.
