Карантин режимін жеңілдету: Алматы қаласының ішіндегі посттар алынды

АЛМАТЫ. ҚазАқпарат - Алматы Полиция департаменті қала ішінде орналастырылған тосқауыл (фильтрация) посттарын алып тастады, деп хабарлайды ҚазАқпарат тілшісі.

Бұл карантиндік режимнің жеңілдеуіне, сондай-ақ көптеген нысандардың жұмысын қайта қалпына келтіруге байланысты болып отыр.

Қалалық полиция басым ресурстарды азаматтардың көп шоғырланған жерлерінде (кішігірім саябақтар, алаңдар) тәртіпті және карантин режимін сақтауды бақылауға бағыттамақ. Сондай-ақ, бұл қызметкерлер жаяу патрульдеу жұмыстарына қатысады.

Полиция жеке қауіпсіздік үшін карантиндік ережелер мен санитарлық-эпидемиологиялық нормалардың қатаң сақталуын ескертеді.

30 наурызда Алматы полициясы қаланың ішінде 26 полиция бекетін ұйымдастыру туралы шешім қабылдаған болатын.

Төтенше жағдайдың режимін қасақана бұзған автокөлік иелері әкімшілік жауапқа тартылған болатын.