Қарулы Күштер Тұңғыш Президент күнін атап өтті
АСТАНА. 3 желтоқсан. ҚазАқпарат - Мереке күндері Қарулы Күштердің барлық әскери бөлімдері мен мекемелерінде жаппай ҚР Тұңғыш Президенті күніне арналған салтанатты жиындар болып өтті.
«Оңтүстік» өңірлік қолбасшылығының 35748 әскери бөлімінде Тұңғыш Президент күніне орай әскери-патриоттық іс-шара ұйымдастырылды. Салтанатты митинг барысында бөлім қолбасшылығы Президентіміздің тәуелсіз Қазақстанның қаз тұрып, қадам басуы мен нығаюына қосқан орасан зор үлесі туралы әңгімелеп берді, сондай-ақ бөлім көркемөнерпаздарының концерті ұйымдастырылды.
Тұңғыш Президент күнін мерекелеу аясында 2013 жылғы 2 желтоқсанда әскери қызметшілер мен олардың отбасы мүшелері қатысқан спорттық мереке болып өтті. Олар волейболдан, баскетболдан, армрестлингтен күш сынасты.
Жалпы командалық 1-орынды штабтық батальонның жеке қүрамы иеленді, екінші орынды артиллерия дивизионы жеңіп алды, ал 3-орын танк батальонына бұйырды.
Сондай-ақ осы күні Елбасымыз Нұрсұлтан Назарбаевтың өмірі мен қызметіне арналған кітаптар мен публицистикалық басылымдар көрмесі ұйымдастырылды, деп хабарлады Қорғаныс министрлігінің баспасөз қызметінен.
