KASE табыстың 30%-ын дивидендтерге бағыттайды

АЛМАТЫ. KAZINFORM – Қазақстан қор биржасының (KASE) акционерлері 2024 жылдың қорытындысы бойынша дивиденд төлеу туралы шешім қабылдады. 

Биржаның ресми порталында хабарланғандай, мұндай шешім биржаның жылдық жалпы жиналысында мақұлданды. Дивиденд төлеуге 4,6 млрд теңге бағытталады. Бұл – KASE-нің өткен жылғы таза пайдасының 30 пайызы. Бір қарапайым акцияға төленетін дивиденд мөлшері 4 310,67 теңге болып белгіленді.

Төлемдер 2025 жылдың 10-шы маусымынан басталады.

Айта кетейік, 2023 жылдың қорытындысы бойынша «Қазақстан қор биржасы» АҚ таза пайдасының 50%-ын, яғни 9,2 млрд теңгені дивидендтерге бөлген еді.

Еске салайық, бұған дейін Әділ Мұхамеджанов Қазақстан қор биржасының басшысы болып тағайындалған болатын.

Кейін KASE басқармасының құрамы өзгерді.