Қасым-Жомарт Тоқаев Еуропалық қайта құру және даму банкінің президентімен кездесті

АТЫРАУ. KAZINFORM – Қасым-Жомарт Тоқаев Еуропалық қайта құру және даму банкінің президенті Одиль Рено-Бассомен кездесті. Бұл туралы Ақорданың баспасөз қызметі хабарлады.

Экономиканың түрлі секторындағы ынтымақтастық мәселелері талқыланды.

2024 жылы Қазақстан Үкіметі мен ЕҚДБ 935 млн долларға 25 жобаны қаржыландыру туралы келісімге қол жеткізді.

Одиль Рено-Бассо ЕҚДБ «жасыл экономика» бағдарламаларын жүзеге асыруға 2 млрд еуро инвестиция құюды жоспарлап отырғаны туралы тың мәліметтер берді.

Қазақстан Президенті банк секторының өркендеуіне қолдау көрсеткені үшін алғыс айтты.

Қасым-Жомарт Тоқаев пен Одиль Рено-Бассо қаржы саласындағы жаһандық үрдістер жөнінде пікір алмасты.

Бұған дейін «Орталық Азия – Еуропа Одағы» саммиті аясында Қасым-Жомарт Тоқаев пен Еуропалық комиссия Президенті Урсула фон дер Ляйен кездесу өткізді.