«Каспий» су тұщыту зауытын кеңейту жобасын аяқтауға қаражат бөлінеді - Үкімет басшысы
АҚТАУ. ҚазАқпарат – Маңғыстау облысына жұмыс сапары аясында Премьер-Министр Әлихан Смайылов өңірді сумен қамтамасыз ету көлемін арттыруға бағытындағы «Каспий» су тұщыту зауытын кеңейту жобасымен танысты. Бұл туралы ҚазАқпарат Үкіметтің ресми сайтына сілтемемен хабарлайды.
2020 жылы басталған зауытты кеңейту жұмыстары қазіргі уақытта аяқталуға жақын. Жобаны іске асыру нәтижесінде «Каспийде» ауыз су беру тәулігіне 40 мың текше метрге дейін ұлғаюға тиіс, бұл өңірді сумен тұрақты түрде қамтып отыруға мүмкіндік береді.
Кәсіпорын директоры Нұрлыбай Аққұлов зауытты жаңғырту бойынша жүргізіліп жатқан жұмыстар туралы баяндады. Оның айтуынша, жобаны аяқтау үшін қажетті жабдықтарды сатып алуға шамамен 5 млрд теңге қажет.
Премьер-Министр Маңғыстау облысындағы Мұнайлы, Түпқараған және Қарақия аудандарының 180 мың тұрғыны үшін бұл жобаның маңызы зор екенін атап өтті.
«Үкімет оны жақын арада аяқтау үшін қажетті қаражатты бөледі. Облыс әкімдігі су тұщыту зауытында жаңа өндірістік қуаттарды жедел іске қосу бойынша барлық шараны қабылдауы қажет», - деді Әлихан Смайылов.
