Каспийде ресейлік алты браконьер ұсталды
АСТАНА. Қазанның 8-і. ҚазАқпарат - Каспийде ресейлік алты браконьер ұсталды, деп хабарлады Қазақстанның Ұлттық қауіпсіздік комитетінің баспасөз қызметінен.
Комитеттің ақпараты бойынша, Каспий теңізінің қазақстандық бөлігінде «Сейф-боат» катері мен шекаралық «Астана» катерінің экипаждары қазанның 7-сі күні мемлекеттік шекарада жауынгерлік кезекшілік атқару кезінде Ресейдің 6 азаматы мінген «байда» типтес екі қайықты ұстады.
Ресейліктер браконьерлікпен айналысып жатқан жерлерінде қолға түсті. Оған қоса, өздерінің төлқұжаттары да болмай шыққан. Қазір бұл факті бойынша тергеу амалы жүріп жатыр.
