Каспийдегі әскерилердің қазасы: Ақтауда үш күнге жоспарланған мерекелік шаралар өтпейді
АСТАНА. KAZINFORM — Ақтауда «Амфитеатр» алаңындағы мерекелік іс-шаралар өткізілмейді, деп хабарлайды Ақтау қаласы әкімдігінің баспасөз қызметі.
Әкімдіктің мәліметінше, Маңғыстау облысында әскери оқу-жаттығу кезінде орын алған қайғылы оқиғаға байланысты 2026 жылғы 25–27 қыркүйек аралығында Ақтау қаласындағы «Амфитеатр» алаңында өткізілуі жоспарланған мерекелік іс-шаралар өткізілмейді.
— Атап айтқанда, 25 қыркүйекке жоспарланған «Каспий — достық теңізі» фестивалінің салтанатты ашылуы, сондай-ақ 27 қыркүйекте өтетін фестиваль-байқаудың жабылу салтанаты мен Ақтау қаласының туған күніне арналған мерекелік гала-концерт өткізілмейді. Қала әкімдігі әскери оқу-жаттығу кезінде қаза болған сарбаздардың отбасылары мен жақын-жуықтарына қайғырып көңіл айтады, — делінген ведомство хабарламасында.
Еске салайық, 2026 жылғы 24 қыркүйекте Каспийдегі әскери оқу-жаттығу кезінде 9 әскери қызметші қаза тапқанын хабарлағанбыз. Үш әскери қызметші құтқарылды. Олардың біреуі ауруханаға жатқызылды. Қалғандарын іздеу жұмыстары жалғасып жатыр.
Кейінірек әскери қызметшілердің қаза болу фактісі бойынша қылмыстық іс қозғалып, тергеліп жатқанын жаздық.
Маңғыстау облысында әскери қызметшілердің қаза болу себептерін тергеп-тексеру жөніндегі үкіметтік комиссия құрылды.
Комиссия құрамына қорғаныс министрі, Маңғыстау облысының әкімі, Еңбек және халықты әлеуметтік қорғау, Төтенше жағдайлар, Денсаулық сақтау, Көлік министрліктерінің басшылығы, Бас әскери прокурор, сондай-ақ шекара қызметінің өкілдері кірді.
Сонымен қатар Президент Қасым-Жомарт Тоқаев Маңғыстау облысында әскери оқу-жаттығу кезіндегі қайғылы оқиға салдарынан қаза тапқан әскери қызметшілердің туған-туыстарына көңіл айтты.
