Қатармен бірге жүзеге асыратын газ жобаларының шарттары қашан белгілі болады
АСТАНА. KAZINFORM - Қатарлық инвестормен газ саласындағы жобаларды жүзеге асыру мәмілесінің соңғы шарттары екі ай ішінде анықталады.
Энергетика министрлігінде қатарлық Power International Holding UCC Holding компаниясының қатысуымен газ саласындағы жобаларды іске асыру бойынша жиын өтті.
Мемлекет басшысының 13-14 ақпандағы Қатарға мемлекеттік сапары аясында QazaqGaz Power International Holding UCC Holding-пен келесі жобаларды бірлесіп жүзеге асырудың негізгі шарттары бойынша міндетті келісімдерге қол қойды:
- Қашаған кен орнында 1 млрд м³ қуаты бар газ өңдеу зауытының құрылысы;
- Қашаған кен орнында қуаты 2,5 млрд м³ газ өңдеу зауытының құрылысы;
- Жаңа КС-14 компрессор стансасының және «КС-14-Қостанай» магистральды газ құбырының құрылысы;
- «Бейнеу — Бозой — Шымкент» магистральды газ құбырының екінші желісінің құрылысы.
Естеріңізге сала кетсек, бұл келісімдер Қазақстанның газ саласын дамытуға ықпал ететін жобаларды жүзеге асыруға бағытталған.
Ақтөбе және Қостанай облыстарында «КС-14 — Қостанай» магистральды газ құбырын салу жобасының стратегиялық маңызы бар және Қостанай облысындағы елді мекендерді де, ірі инвестициялық жобаларды да газдандыруға бағытталған.
Бейнеу-Бозой-Шымкент газ құбырының екінші желісі — Қазақстанның оңтүстік және орталық аймақтарын газбен қамтамасыз ететін маңызды газ артериясы.
Қашағанда газ өңдеу зауыттарын салу еліміздегі тауарлық газдың өңдеу қуаты мен ресурстық базасын ұлғайтуға мүмкіндік береді.
