«Қайрат» еурокубок ойындарынан 2 млрд теңге табыс тапты
АСТАНА. KAZINFORM – Алматының «Қайрат» футбол клубы 2026/27 жылғы еурокубок маусымында шамамен 2 млрд теңге табыс тапты, деп хабарлайды Sports.kz.
Конференциялар лигасының жалпы кезеңіндегі үшінші турда «Қайрат» италиялық «Аталантамен» 1:1 есебімен тең түсті. Осы нәтиженің арқасында алматылық клуб УЕФА тарапынан қосымша сыйақы алады.
Жалпы кезеңде «Қайрат» екі кездесуді тең аяқтаған. Әр тең ойын үшін клубқа 133 мың еуродан (67,1 млн теңге) төленеді.
– «Қайрат» Конференциялар лигасының жалпы кезеңіне шыққаны үшін 3,17 млн еуро (1,6 млрд теңге) табыс тапты. Бұған дейін клуб Чемпиондар лигасының үш іріктеу кезеңіне қатысқаны үшін 525 мың еуро (264,9 млн теңге) сыйақы алуға мүмкіндік алған. Осылайша алматылық команданың қазіргі жалпы табысы 3,961 млн еуроға немесе шамамен 2 млрд теңгеге жетті, – делінген ақпаратта.
Бұл сомаға клубтың Конференциялар лигасының жалпы кезеңіне жолдама алғаны, Чемпиондар лигасының іріктеу сатыларына қатысқаны және екі кездесуде тең түскені үшін берілетін сыйақылар кіреді.
Айта кетейік, бұған дейін «Қайраттың» 2025/26 жылғы маусымда Чемпиондар лигасының негізгі кезеңіне қатысқаны үшін 18,62 млн еуро көлемінде сыйақы алғаны хабарланған болатын.
